" फेसबुक्या उत्माळ !! "

                           प्रस्तुत रचना, मोबाइल या कैमरे की चौंधियाती " फ्लैश " से नवजात की नाजुक त्वचा व आँखों पर पड़ने वाले विपरीत प्रभाव से बेपरवाह, नवजात शिशुओं की तस्वीरें, फेसबुक पर जन्म के तुरंत बाद " आशीर्वाद " हेतु पोस्ट करने, संस्कृति व माता-पिता की उपेक्षा और फेसबुक केन्द्रित व्यवहार पर, पूर्व क्षमा सहित, व्यंग्य है.

" फेसबुक्या उत्माळ !! "

अभि अभी जन्मि नौनु
आँखि टिमणाणि छन् ...
शहद चटौंण
भुलि ग्य्न बुबा जी !
फ्लैश चमकै चमकै,
फोटु कु सही
एंगल खुजौणा छन !

बुबा कु बमताल देखि,
पड़ोसि मुक लुकैकि
  खित् खित् हैंसणा छन् !
पर बुबा जि तैं
परवा नि कैकि !
फोटु खिंच्ण मा
  रंगमत बण्यां छन् !

बुड् बुड्या
  धोळ्यान् छन् गौं मा !
  सासु जि परवांण बणी छन् !
नौनि का उळार मा,
   जवैं कु सैडू ..
    घर बार संभाळनि छन् ...

नाति देख्णा खातिर
बुवे बुबा कि गौं मा
आंखि सुखणि छन् ...
दिल्ली मा ..
बुबा जि पर
          फेसबुक्या "उत्माळ" चढ्युं ____
   फेसबुक्या दग्डियों सि ..
   आशीर्वाद मांगणा छन !!

संस्कारों कि बात नि करा
   अब जमानु बदळ गि ..
पंडा जि संविदा
     डाळनों तैं बुलौणा___
यजमान हवन कु
   फेसबुक्या एंगल खुजौणा छन् !!

.. विजय जयाड़ा